Föt af bæjarbúum úti í fjöru

Snögg viðbrögð björgunarsveitarmanna í Neskaupstað komu í veg fyrir stórtjón þegar tvö stór skip slitnuðu frá bryggju í veðurofsanum í gærkvöldi. Veður hefur nú lygnt um allt land en vegagerðin varar við að aðeins er mokstur á helstu umferðaræðum í kringum höfuðborgarsvæðið.

Vonskuveður gekk yfir landið í gærdag og kvöld og setti samgöngur úr skorðum víða um land. Um kvöldmatarleytið í gærkvöldi var veðrið verst á austurlandi og þurftu björgunarsveitarmenn í Neskaupstað að fresta jólahaldi á meðan þeir sinntu fjölda útkalla.

„Það má kannski segja að flest sem að gat fokið, það fauk í gærkvöldi. Það voru þakrennur, vörubretti, grill, ruslatunnur og fatagámur rauðakrossins fauk hérna út í sjó og þá má finna föt af bæjarbúum hérna um fjöurnar. Svo fauk einn bíll sem hafði verið illa lagt, hann fauk út í götu og hann var dreginn í burtu," segir Pálmi Benediktsson, formaður Björgunarsveitarinnar Gerpir í Neskaupstað.

Um klukkan níu slitnuðu síðan frystitogari og flutningaskip frá bryggju.

„Það voru einhverjir með augun á vefmyndavélunum sem eru staðsettar inni í höfn og fylgdust beinlínis með því þegar barðinn slitnaði frá og við vorum komnir a staðinn örfáum mínútum eftir að þetta gerist," Pálmi.

Hann segir mikla mildi í því að ekki fór verr en það tók hátt í þrjár klukkustundir að koma skipunum aftur að landi og festa þau. Vindhviður fóru yfir fimmtíu metra á sekúndu í bænum og segist Pálmi sjaldan hafa kynnst öðrum eins veðurofsa.

Samkvæmt upplýsingum frá veðurstofunni hefur veður nú lygnt um mest allt land og vöknuðu til dæmis höfuðborgarbúar við ekta jólasnjó í morgun.

Vegagerðin varar við því að vegir sem eru að jafnaði mokaðir daglega eru opnaðir í dag en engin þjónusta verður á þeim frameftir nema í kringum höfuðborgarsvæðið þar sem mesta umferðin er, þar er sólarhringsþjónusta á vegum.

Vegir eru víða ófærir á vestfjörðum og austanlands en að öðru leyti nokkuð góð færð og yfirleitt ekki flughálka.

Lögreglan á höfuðborgarsvæðinu vill þó beina því til fólks að fara varðlega þar sem færð á götum og gangstígum borgarinnar er ekki góð, snjóþekja er á öllum leiðum og mjög hált undir snjónum.