Katarar vilja ekki halda HM um vetur

Mohamed Bin Hammam, forseti knattspyrnusambands Katar, hefur hafnað tillögum Alþjóða knattspyrnusambandsins, FIFA, um að HM 2022 þar í landi fari fram um vetur.

Eftir að ljóst varð að keppnin yrði haldin í Katar kom strax mikil óánæjga í ljós, ekki síst á meðal knattspyrnumannanna sjálfra, að halda keppnina á þessum slóðum yfir sumartímann þegar hitinn getur orðið nánast óbærilegur.

„Ég hef ítrekað sagt að ekki standi annað til en að halda keppnina á sínum venjulega árstíma, í júní og júlí," sagði Bin Hammam við enska fjölmiðla.

„Þannig hefur þetta verið alla tíð og slík breyting myndi hafa gríðarleg áhrif á knattspyrnuiðkun víða um heim. Þess vegna erum við mótfallnir þessu og við skiljum vel áhyggjur knattspyrnudeilda og félaga í Evrópu af þessum tillögum."

Bin Hammam sagði einnig að hann myndi íhuga að fara í framboð gegn Sepp Blatter, forseta FIFA, í næsta forsetakjöri sambandsins.

„Ég hef ekkert á móti Blatter ef hann vill halda áfram. En hann þarf að fá samkeppni um embættið. Það er slæmt fyrir sambandið ef forseti þess yrði sjálfkjörinn."