Aftur heim - lagið hans Sjonna

Lag tónlistarmannsins Sigurjóns Brinks, sem varð bráðkvaddur á heimili sínu fyrir viku, hefur verið gert aðgengilegt á heimasíðu RÚV en lagið tekur þátt í undankeppni Eurovision.

Sigurjón hafði skilað inn upptöku af laginu, þar sem hann syngur sjálfur, en eiginkona hans Þórunn Erna Clausen samdi textann. Um tíma var óljóst hvort lagið yrði dregið úr keppni, en í samráði við fjölskyldu og vini Sigurjóns var ákveðið að lagið verði flutt í síðasta undanúrslitaþætti keppninnar næstkomandi laugardag.

Lagið heitir Aftur heim og verður flutt af vinum hans. Hér má heyra upptöku af laginu.