Innlent

Segir stórt álver á Bakka mjög ólíklegt

Forstjóri Landsvirkjunar segir mjög ólíklegt að stórt álver rísi við Húsavík, eins og Alcoa vill. Viljayfirlýsing um metanólverksmiðju í Kröflu hafi þó ekki sett aðra iðnaðarkosti aftar í röðina og lítið álver á Bakka sé ekki útilokað.

Viljayfirlýsing Landsvirkjunar við Carbon Recycling um metanólverksmiðju í Mývatnssveit kom flatt upp á ráðamenn á Húsavík, sem spyrja sig nú hvort sex ára undirbúningur álvers á Bakka hafi verið til einskis. Byggðarráð Norðurþings harmar í bókun að Landsvirkjun hafi ekki upplýst um gang mála og spyr hvaða áhrif þessi áform hafi á önnur verkefni.

Forstjóri Landsvirkjunar, Hörður Arnarson, segir hins vegar að viljayfirlýsingin sé aðeins til að kanna hvort Kröflusvæðið henti fyrir metanólverksmiðju. Hún sé ekki skuldbinding og aðrir aðilar séu ekki aftar í röðinni. Landsvirkjun sé að ræða við 4-5 aðila og þeir séu allir mjög áhugaverðir.

Engu að síður segir Hörður að Landsvirkjun hafi áhuga á að fjölga í þeim hópi og fá allt að tíu aðila sem hafi áhuga á svæðinu. Það sé markmiðið fyrir þetta ár. Það virðist hins vegar nokkuð ljóst, að mati Harðar, að vegna takmarkaðrar orku kemur stórt álver tæpast til greina á Bakka.

"Hins vegar er ljóst að 360 þúsund tonna álver, eins og Alcoa fékk umhverfismat fyrir, það er mjög ólíklegt að það rísi á staðnum," segir Hörður.

Hann vill þó ekki útiloka minna álver, þótt við blasi að álfyrirtæki vilji hafa þau sem stærst. Landsvirkjun sé að ræða við aðila sem vilji minni álver. Það sé hins vegar algjörlega óvíst hver verði niðurstaðan af því, enda fylgi mikil stærðarhagkvæmni álverum.

Húsvíkingar þurfa þó ekki að örvænta um að ekkert rísi á Bakka, það geri nálægð við höfn og þéttbýlið á Húsavík.

"Bakki hlýtur að verða miðpunktur uppbyggingarinnar á þessu svæði," segir Hörður.









Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.