Í lífshættu eftir hrottalega árás

Lögreglan á höfuðborgarsvæðinu handtók í gær og fyrradag fjóra menn sem grunaðir eru um að hafa gengið svo í skrokk á manni að hann var í lífshættu eftir misþyrmingarnar.

Árásin átti sér stað á sunnudagskvöld í iðnaðarhúsnæði í austurborginni, eftir því sem Fréttablaðið kemst næst. Ekki var ljóst um tildrög hennar að öðru leyti en því að eitthvert ósætti mun hafa verið.

Maðurinn sem fyrir árásinni varð var fluttur á spítala og lagður inn á gjörgæslu með innvortis blæðingar.

Árásarmennirnir eru milli tvítugs og þrítugs og fórnarlambið á sama reki. Þeir fyrrnefndu hafa allir komið við sögu lögreglu áður.- jss