Minnihluti undrast starfslokin

Haraldur Flosi Tryggvason, stjórnarformaður Orkuveitu Reykjavíkur, er ekki lengur í fullu starfi hjá fyrirtækinu. Fram kom í máli Jóns Gnarr borgarstjóra á borgarstjórnarfundi í síðustu viku að Haraldur Flosi hefði að eigin frumkvæði verið í hálfu starfi frá því í mars og hefði svo látið alfarið af störfum 1. júní. Hann hefði ekki talið þörf á kröftum sínum lengur.

Sóley Tómasdóttir, borgarfulltrúi Vinstri grænna, lýsti yfir undrun á þessum upplýsingum, enda hefði minnihlutanum ekki verið þetta ljóst. Ákveðið hefði verið á aðalfundi í júní í fyrra að Haraldur Flosi skyldi vera í fullu starfi fram að næsta aðalfundi Orkuveitunnar, sem var nú í júní. Hann hefði ekki haft vald til að taka ákvörðun um starfslok einn síns liðs og velti Sóley upp þeirri spurningu hvort Haraldur hlyti ekki að eiga rétt á fullum launum fram að aðalfundinum í júní síðastliðnum.

Aðrir fulltrúar minnihlutans tóku undir það með Sóleyju að þetta væru einkennileg vinnubrögð og kröfðust skýrari svara frá meirihlutanum.

Dagur B. Eggertsson, formaður borgarráðs, spurði Sóleyju hins vegar á móti hvort spurning hennar hefði verið svokallað grín. "Mér finnst fólki orðin býsna laus höndin með peninga ef það á að neyða upp á fólk fé fyrir starf sem það hefur trappað niður að eigin frumkvæði," sagði Dagur. Hrósa bæri Haraldi Flosa fyrir ákvörðun hans, enda kvæði samþykkt aðalfundarins á um að stjórnarformaðurinn yrði í fullu starfi "tímabundið á meðan lagt er vandað mat á aðstæðum," og nauðsynlegum breytingum ýtt úr vör.

"Nei, ég er ekki að grínast," svaraði Sóley. Ákvörðun aðalfundar yrði ekki breytt af Haraldi Flosa einum og því miður myndi þetta kannski "kosta borgarbúa skildinginn".- sh