Vilja ekki gera kjósendur sína reiða

Stjórnmálamenn eru allt of tregir til að ganga gegn kjósendum sínum af ótta við að gera þá reiða. Ákveðinnar undanlátssemi gætir í samfélagsumræðunni og enginn vill stíga fram og segja að það sé of langt gengið þegar eggjum og öðrum hlutum er kastað í þingmenn á Austurvelli. Þetta er mat Stefaníu Óskarsdóttur stjórnmálafræðings.

„Það virðist vera hræðsla í gangi gagnvart þessum öflum, sem eru að feta sig lengra og lengra í átt að upplausn,“ segir Stefanía. Hún telur ekki eðlilegt að alþingismenn séu grýttir og fólk sé með óspektir á almannafæri við þingsetningu. „Þetta endurspeglar gífurlega mikil átök um hagsmuni. Við lifum á tímum niðurskurðar og samdráttar og kreppan er að bíta í fólk. Þetta verður ekki auðveldlega leyst,“ segir Stefanía. „Þá beinist reiðin að stjórnvöldum og það er gerð sú krafa að þau leysi hvers manns vanda.“