Neðansjávarhátalarar og hugmyndafræðilegur veitingastaður keppa

Tuttugu og eitt verkefni hefur verið sent til dómnefndar og kemur til greina að hljóta Nýsköpunarverðlaun forseta Íslands. Að þessum verkefnum koma 34 nemar frá fjórum íslenskum háskólum auk þess sem tveir nemar koma frá erlendum skólum. Fjórtán nemendur koma frá Háskóla Íslands, ellefu frá Listaháskóla Íslands, sex frá Háskólanum í Reykjavík og einn frá Háskólanum á Akureyri.

Á vef Rannsóknarmiðstöðvar Íslands má finna lýsingar á hverju þeirra verkefna sem komið er í úrslit. Meðal þeirra eru leikjafyrirtæki sem þróar nýjar tegundir leikja til að fást við streitu, hönnun og smíði neðansjávarhátalara til notkunar við opið þorkseldi, og hugmyndafræðilegur veitingastaður þar sem upplifun, fræðsla og umhverfisvitund fara saman.

Aldrei fleiri nýsköpunarstyrkir

Nýsköpunarsjóður námsmanna hefur aldrei veitt jafnmarga styrki og árið 2010, en sjóðurinn styrkti 255 verkefni á liðnu ári. Verkefnin voru gífurlega fjölbreytt og fór vinnan fram í öllum landshlutum en um 350 nemendur voru styrkþegar sjóðsins síðastliðið sumar.

Lokapunktur og jafnframt hápunktur ferilsins er úthlutun Nýsköpunarverðlauna forseta Íslands til þeirra verkefna sem þóttu skara fram úr. Allir nemendur sem skila inn lokaskýrslu fyrir auglýstan frest koma til greina við veitingu verðlaunanna. Að þessu sinni bárust 215 lokaskýrslur til sjóðsins fyrir tiltekinn dag og var stjórninni vandi á höndum að velja verkefni sem komast áfram. Aðeins 10% verkefna fara áfram til dómefndar sem síðan velur verkefnin sem hljóta tilnefningu og að lokum verðlaunaverkefnið sjálft.

Á hverju ári er síðan skipuð sérstök dómnefnd sem hefur það vandasama verkefni að velja bæði verkefnin sem hljóta tilnefningu og verðlaunaverkefnið sjálft. Nefndin er skipuð fulltrúum frá Rannsóknamiðstöð Íslands, mennta- og menningarmálaráðuneytinu, Stúdentaráði Háskóla Íslands, Samtökum iðnaðarins og Reykjavíkurborg. Verðlaunaafhendingin fer fram á Bessastöðum í febrúar næstkomandi.

Smellið hér til að lesa um öll verkefnin sem komin eru í úrslit.

Hér má síðan fræðast um þau verkefni sem verðlaunum hafa verið á liðnum árum.