Kærleikarnir haldnir hátíðlegir

Hátíðin Kærleikar fer nú fram á Austurvelli og er hluti af Vetrarhátíð.

Hátíðin er haldin til að skapa samkennd, veita hvatningu og styrk. Tilgangurinn er að sameinast um að fagna kærleikanum og senda jákvæða strauma út í samfélagið.

Hátíðin hófst á því að nokkrir þjóðþekktir einstaklingar veittu gestum fegurð og styrk með því að deila með þeim hugleiðingum um kærleikann og það sem tengir fólk saman. Að því loknu verður kyndlaganga í kringum Tjörnina ásamt Lúðrasveit Verkalýðsins. Þá sameinast kórar Reykjavíkur við Reykjavíkurtjörn í fjöldasöng. Stjórnandi er Jón Stefánsson. Hátíðin er nú haldin í þriðja sinn.

Lúðrasveit Verkalýðsins, Þórður Guðnason maður ársins, Ragnheiður Gröndal söngkona, Leikhópurinn Perlan, Sönglist, Rauði Krossinn, Veraldavinir, Hlutverkasetur, Hjálparsveitirnar, Kór Langholtskirkju og fleiri hafa boðað komu sína.

Litur hátíðarinnar er rauður og því er upplagt að mæta með eitthvað rautt í klæðum t.d. rauðan trefil, vettlinga eða í rauðri peysu.

Skipuleggjandi og hugmyndasmiður hátíðarinnar er Bergljót Arnalds.