Blekkja erlendar konur

Oft hefur það komið upp að konur af erlendum uppruna hafa verið fengnar til að skrifa upp á skuldaviðurkenningar fyrir eiginmenn sína og vitað er um dæmi þess að þær hafi jafnvel verið blekktar til að afsala sér forsjá barna sinna. Þetta segir lögmaður sem annast hefur mál erlendra kvenna.

Samtök kvenna af erlendum uppruna segja að dæmi séu um að konur af erlendum uppruna hafi verið blekktar til afsala sér ýmsum réttindum og jafnvel afsala sér forsjá barna sinna. Sabine Leskopf, varaformaður félagsins, segir brýnt að starfsfólk opinberra stofnanna reyni að fræða þær eftir fremsta megni um réttindi sín og upplýsi þær um hvað þær eru að skrifa undir.

Margrét Steinarsdóttir er framkvæmdastjóri Mannréttindaskrifstofu og starfaði áður sem lögfræðingur Alþjóðahúss.

„Það komu allnokkur erindi inn á borð hjá Alþjóðahúsi varðandi það að einstaklingar tóku á sig einhverjar skyldur eða afsöluðu sér réttindinum, af því þeir vissu ekki hvað þeir voru að skrifa undir og þekktu ekki rétt sinn."

Margrét segir mikilvægt að opinberar stofnanir tryggi að fólk skilji hvað það skrifar undir, öðruvísi verði leiðbeiningaskyldu stjórnvalds ekki framfylgt. Misjafnt sé eftir stofnun hvernig þessari skyldu sé sinnt.

Hún segir erfitt fyrir fólk að sanna að það hafi verið beitt blekkingum við undirskrift.

Ari Klængur Jónsson verkefnisstjóri fjölmenningasetursins á Ísafirði segir að þörf sé að rannsaka þessi málefni betur.

Hann bendir á að athuganir á forsjármálum kvenna sem hingað flytja utan Evrópu til að giftast Íslendingum bendi til þess að þær standi ekki jafnfætis Íslendingum. Þær athuganir þarfnist frekari rannsókna en ef rétt reynist sé það mjörg alvarlegt.