Hundastríð á Selfossi: Svefnvana leigubílstjóri berst gegn hundahaldi

„Ég er búinn að kæra þetta tvisvar til lögreglunnar," segir rúmlega fimmtugur leigubílstjóri sem býr í fjölbýlishúsi á Selfossi, en hundahald nágranna hans veldur slíku ónæði að hann getur varla sofið eftir næturvaktirnar. Spurður hvort hann hafi rætt við formann húsfélagsins, svarar leigubílstjórinn því til að það sé hann sem eigi hundinn.

Leigubílstjórinn vinnur meðal annars á nóttinni og því er ónæðið af hundinum talsvert þegar eigendur hundsins eru í vinnunni, „og hann geltir endalaust hérna á neðri hæðinni," segir leigubílstjórinn pirraður.

Hann segir fleiri íbúa vera með hunda enda gengur formaðurinn ekki beinlínis fram með góðu fordæmi að mati leigubílstjórans.

„Og það sem er verra er að það er þvílíkur óþrifnaður af þessu hérna fyrir utan," segir leigubílstjórinn en svo virðist sem eigendur hundanna séu ekki nógu duglegir að þrífa upp stykki dýranna.

Leigubílstjórinn fékk að lokum nóg og reyndi að kæra málið til lögreglunnar. „En þeir hlógu næstum því að mér og sögðu mér að þeir hefðu hvorki mannskapinn né tímann í svona mál."

Leigubílstjórinn hefur nú leitað til bæjaryfirvalda.

Formaður og framkvæmdastjóri Húseigendafélagsins, Sigurður Helgi Guðjónsson, segir dýrahald í blokkum þrálátt vandamál. En almenna reglan sé sú að ef einn íbúi leggist gegn dýrahaldinu þá eigi það að vera bannað. Hann segir úrræði fólks, sem er ósátt við dýrahald í fjölbýlishúsum, vera helst þau að leita til heilbrigðiseftirlitsins í viðkomandi sveitarfélagi.

„Ég er nú sjálfur hundamaður," segir Sigurður og bætir við: „En ég hef oft orðið var við að hundaeigendur vaða yfir aðra og eru að auki ekki mjög tillitsamir."

Sigurður segir hundaeigendur líta mjög persónulega á svona mál og eigi stundum erfitt með að skilja að hundahald getur valdið astma- og ofnæmissjúkum, og svefnvana leigubílstjóra í þessu tilviki, talsverðum ama.

Sigurður segir reglurnar þó of strangar eins og þær eru nú en hann ásamt starfshópi hefur samið nýtt frumvarpum um dýrahald í fjöleignarhúsum sem er til skoðunar á Alþingi.

Sigurður segir að áður hafi í raun verið gengið of langt í að verja réttindi astma- og ofnæmissjúkra, meðal annars á kostnað fólks með hjálpar- og blindrahunda. Til stendur að breyta því í frumvarpinu sem liggur fyrir á Alþingi.