Meintur nauðgari flutti til útlanda - rannsókn á lokastigi

Rannsókn lögreglu á nauðgun sem ungur piltur kærði karlmann um þrítugt fyrir í maí á síðasta ári er á lokastigi. Samkvæmt upplýsingum frá lögreglu hefur verið erfitt að ná í manninn þar sem hann fluttist búferlum erlendis í kjölfar kærunnar. Von var þó á honum til landsins nú um jólin, þar sem ráðgert var að ræða við hann.

Maðurinn kom þó ekki til landsins og er ekki von á honum hingað á næstunni eftir því sem fréttastofa kemst næst. Lögregla hefur þó verið í sms-sambandi við manninn vegna málsins en einungis á eftir að ræða við nokkur vitni áður en málið verður sent til saksóknara, sem ákveður hvort gefin verði út ákæra eða ekki.

Fyrst var sagt frá málinu í Fréttablaðinu þann 19.maí síðastliðinn en þar kom fram að maðurinn hefði boðið piltinum, sem er um tvítugt, í samkvæmi heim til sín í Hafnarfirði. Þegar þangað var komið var enginn nema húsráðandi á staðnum. Áfengi var haft um hönd og sofnaði pilturinn í kjölfarið. Hann vaknaði síðan við að maðurinn var að misnota hann.

Pilturinn fór nokkru síðar á neyðarmóttöku fyrir fórnarlömb kynferðislegs ofbeldis á Landspítalanum og kærði í kjölfarið.

Þetta mun ekki vera í fyrsta skipti sem maðurinn er sakaður um nauðgun. Fréttastofa Stöðvar 2 birti viðtal við annan pilt sem sagði svipaða sögu þegar málið komið upp í maí á síðasta ári.