Samfélagið er í uppnámi

Kolbrún Björt Sigfúsdóttir hélt til Taílands í ágúst í ævintýraleit en hamfarirnar hafa breytt hversdeginum. Um þriðjungur af Taílandi er nú undir vatni eftir mestu flóð í landinu á síðustu 50 árum.

„Það rigndi frá fyrsta degi. Við lentum 12. ágúst, beint inn í monsúntímabilið en þessi rosalegu flóð voru ekki fyrirséð. Þau hafa sett svolítið strik í reikninginn hjá okkur því kennsla hefur legið niðri í sex vikur," segir Kolbrún Björt Sigfúsdóttir um lífið í Taílandi þar sem hún og maður hennar, Erlingur Grétar Einarsson, eru ráðin til að kenna taílenskum leikskólabörnum ensku.

Hún segir monsúnregnið fela í sér gríðarlegt vatnsmagn á hverju ári en flóðin nú séu þau mestu í fimmtíu ár. „Fólk er að berjast við allt að þriggja metra djúpt vatn og það er raunverulegt neyðarástand í einum þriðja hluta landsins. Samfélagið í heild er í miklu uppnámi."

Þó að leikskólabörnin séu víðs fjarri þurfa Kolbrún Björt og Erlingur að vera í skólanum í sex til sjö tíma daglega en eftir það fara þau út að borða, enda eldhús sjaldgæf á heimilum, að sögn Kolbrúnar. Hún kveðst hafa kynnst skemmtilegu fólki í Taílandi, bæði aðkomnu og innfæddu og fólkið sem þau leigi hjá sé duglegt að kynna þeim taílenska menningu. „Við höfum skoðað helstu hof og minnismerki í nágrenninu, lært að steikja núðlur og spila á taílensk hljóðfæri, auk þess að sitja fíla og skoða apana í Lop Buri sem hafa lagt undir sig miðbæinn. Ég var reyndar bitin af einum," segir hún glaðlega. „En það var engu að síður mjög merkilegt."

Nokkrum sinnum kveðst Kolbrún Björt hafa komið til Bangkok og segir hana áhugaverða borg þegar komist hafi verið yfir umferðarbrjálæðið og söluhörkuna. „Við höfum líka heimsótt eyna Koh Samet og látið öldurnar rugga okkur og sólina sleikja okkur," segir hún og heldur áfram að telja upp ævintýri. „Í Kanchanaburi skoðuðum við brúna yfir Kwai-fljótið og kíktum í frábært tígrisdýrahof þar sem við fengum að ganga með tígrunum, klappa þeim og sjá þá leika sér. Það er með því mest spennandi sem ég hef upplifað! Við hjónin höfum alltaf verið mjög hrifin af stórum kattardýrum þannig að þarna fengum við að lifa langþráðan draum."

Kolbrún og Erlingur stefna á að vera í Taílandi út febrúar og eru því rétt að byrja að kynnast því hvað landið hefur að bjóða. „Við hlökkum mikið til að fara til Phuket og Chiang Mai og svo væri ekki leiðinlegt að læra að kafa," segir Kolbrún Björt. „En ævintýrin liggja ekki síður í hversdeginum – í því að finna froska í skónum sínum eða labba um markaðinn og furða sig á því sem er í boði. Þetta er allt hluti af upplifuninni."

gun@frettabladid.is