Var 32 prósentum yfir mörkum

Magn díoxíns í mjólkursýni frá Efri-Engidal í Skutulsfirði var 3,98 píkógrömm í grammi af fitu (pg/g) en leyfilegt magn er þrjú píkógrömm díoxíns í hverju grammi. Mjólkursamsalan á Ísafirði lét gera mælinguna á bænum, sem stendur 1,5 kílómetra frá sorpbrennslustöðinni Funa í Skutulsfirði.

Til samanburðar hefur Matvælastofnun fengið upplýsingar í gegnum RASFF-hraðviðvörunarkerfi Evrópu um dioxínmengun í þýsku fóðri sem fjallað hefur verið um í fjölmiðlum. Mengunin stafar frá iðnaðarolíu sem notuð var til fóðurgerðar frá nóvember síðastliðnum og hefur fundist í svínakjöti, eggjum og alifuglum auk fóðurs. Hæsta gildi díoxíns mældist í eggjum tólf píkógrömm í hverju grammi fitu.

Á vegum Matvælastofnunar fer nú fram rannsókn á díoxíni í kjötafurðum frá kindum í Skutulsfirði og einnig verða tekin ný sýni úr mjólk og fóðurrúllum frá Efri-Engidal. Gera má ráð fyrir að mánuður líði frá því að sýnin eru send þar til niðurstöður liggja fyrir.

Haldinn var fundur á þriðjudag í stjórnskipaðri samstarfsnefnd um sóttvarnir vegna díoxín­mengunar. Samkvæmt upplýsingum frá sóttvarnalækni hafa læknar ekki orðið varir við einkenni af völdum díoxíns eða annarra eitrana meðal íbúa á Ísafirði.

- shá