Annir í sjúkraflutningum

Mikið hefur verið að gera í sjúkrafluginu undanfarinn sólarhring, en frá miðnætti til hádegis í dag voru útköllin orðin fimm talsins samkvæmt tilkynningu sem finna má á vefsíðu Mýflugs.

Að jafnaði eru útköllin 1-2 á dag, en þess á milli koma dagar þar sem talsvert meira getur verið að gera. Það sem af er nóvember eru komin 15 sjúkraflug, þar af þau fimm sem flogin voru í dag. Nauðsynlegt reyndist að skipta um áhöfn á Akureyri um hádegisbilið áður en fyrri áhöfnin kláraði leyfilegan vakttíma.

Flugleið dagsins var: Akureyri-Reykjavík-Egilsstaðir (óskað var eftir flugi til Neskaupsstaðar en þangað reyndist ófært)-Reykjavík-Akureyri-Bíldudalur-Reykjavík-Akureyri-Reykjavík-Ísafjörður-Akureyri.

Þegar margar beiðnir berast á stuttu tímabili er þeim ávallt forgangsraðað eftir alvarleika tilfella. Flug á hæsta forgangi eru flokkuð sem F1, en sá útkallsflokkur á við þegar lífshætta er annarsvegar. Alls eru flokkarnir fjórir talsins, F1, F2, F3 og F4, sem er millistofnanaflutningur.

Vel gekk að sinna tilfellum næturinnar og urðu engar tafir að ráði.

Þann 28. október síðastliðinn urðu einnig óvenju mörgu útköll, eða sex talsins. Fyrsta beiðni dagsins barst kl.09:47 og var ekki búið að sinna öllum tilfellum fyrr en rúmum 10 klukkustundum síðar. Alls voru farin 34 sjúkraflug í október og því er heildarfjöldi útkalla á árinu kominn í 403.