Leikjatölvum stolið

Brotist var inn í félagsmiðstöð unglinga í Garði um síðustu helgi og þaðan stolið þremur leikjatölvum ásamt fylgihlutum og leikjum. Þetta kemur fram á vef sveitarfélagsins.

Þar segir að tölvurnar, sem eru af tegundunum Playstation 1 og 2 og Nintendo Wii, og aukahlutirnir hafi verið geymdar á tveimur stöðum í húsinu. Ekkert bendi til þess að rótað hafi verið til og af því megi ráða að gerningsmenn hafi verið kunnugir innanhúss. Borðtölvur og tölvuskjáir voru einnig látin vera. Þeir sem geta gefið upplýsingar um málið eru beðnir um að hafa samband við forstöðumann og er fundarlaunum heitið.- þj