Ekki um tvo erlenda menn að ræða

Ekki var um tvo erlenda karlmenn að ræða þegar ráðist var á tæplega tvítuga konu í Vestmannaeyjum á sunnudagsmorgninum síðastliðnum. Konan hefur dregið vitnisburð sinn til baka en hefur ekki viljað upplýsa hver eða hverjir það voru sem réðust á hana.

Samkvæmt upplýsingum frá rannsóknardeild lögreglunnar í Vestmannaeyjum kom þetta í ljós við rannsókn málsins, en konan leitaði til lögreglu seinnipart sunnudagsins og kærði tvo karlmenn, sem hún taldi vera af erlendum uppruna, fyrir líkamsárás. Hún sagði þá hafa ráðist á sig, áreitt sig kynferðislega og rifið utan af henni sokkabuxurnar en hún hefði komist undan. Konan sagði mennina hafa verið á þrítugsaldri, um 180 sentímetra á hæð, dökkhærða og lýsti klæðaburði þeirra.

Greinilegir áverkar voru á konunni, svo ekki fór á milli mála að ráðist hafði verið á hana. Hins vegar hefur hún ekki tilgreint um hvern var að ræða, líkt og áður sagði, eftir að hún breytti vitnisburði sínum.

Málið er enn í rannsókn, en að sögn lögreglu er lítið hægt að gera fyrr en konan er tilbúin að veita upplýsingar um þann eða þá sem voru að verki.- sv