Stjórnarflokkarnir deila um gangagerð

Fresta þurfti fundi fjárlaganefndar í gær vegna andstöðu fulltrúa Samfylkingarinnar við fjárheimild vegna Vaðlaheiðarganga. Málið var tekið fyrir á þingflokksfundi flokksins í gær og loks náðist sátt um það seinnipartinn.

Samkvæmt heimildum Fréttablaðsins eru nokkrir þingmenn Samfylkingarinnar verulega ósáttir við heimildina til ráðherra. Þeir bera brigður á forsendur Vaðlaheiðarganga ehf. um hagkvæmni ganganna. Vilji er til þess að óháðir aðilar fari yfir forsendurnar og meti framkvæmdina upp á nýtt.

Það er í takt við afgreiðslu umhverfis- og samgöngunefndar sem samþykkti á fundi sínum í gær að fela Ríkisendurskoðun að fara yfir forsendur gangagerðarinnar. Ekki náðist sátt um slíka málsmeðferð innan fjárlaganefndar.

Samkvæmt heimildum Fréttablaðsins var málið komið í harðan hnút og um hríð var einfaldlega neitað að afgreiða fjáraukalagafrumvarpið fyrr en afdrif heimildarinnar kæmust á hreint. Þrátt fyrir langan fund um málið á þriðjudag þurfti að fresta fundi nefndarinnar í gær til að ná fram niðurstöðu.

Guðfríður Lilja Grétarsdóttir, þingmaður Vinstrihreyfingarinnar – græns framboðs, lofsamaði samþykkt umhverfis- og samgöngunefndar á þingi í gær. Hún sagðist ekki skilja að nokkur setti sig á móti því að fá óháðan aðila til að meta framkvæmdina og grundvöll hennar. Framkvæmdin væri afar dýr og mikilvægt að standa rétt að málum.

Meirihluti fjárlaganefndar leggur til að fjármálaráðherra verði veitt heimild til að lána allt að einum milljarði króna til Vaðlaheiðarganga ehf. Sú forsenda að framkvæmdin standi undir sér að öllu leyti er enn óbreytt.

Meirihlutinn leggur hins vegar áherslu á að áður en stofnað er til skuldbindinga ríkisins komi málið aftur til fjárlaganefndar og verði kynnt henni með fullnægjandi hætti.

Einar K. Guðfinnsson, varaformaður þingflokks Sjálfstæðisflokksins, og Gunnar Bragi Sveinsson, formaður þingflokks Framsóknarflokksins, kvörtuðu á þingi í gær yfir meðferð málsins. Það hve seint fjárlaganefnd afgreiddi fjáraukafrumvarpið gerði það að verkum að þingmönnum gæfist knappur tími til að kynna sér það fyrir umræðuna sem hefst á Alþingi í dag. kolbeinn@frettabladid.is