Fjölbreytilegar framtíðarsýnir

Fimm hugmyndir voru í gær valdar úr 102 tillögum sem þær áhugaverðustu um framtíð þjóðgarðsins á Þingvöllum. Við val sitt hafði dómnefndin til hliðsjónar hvort tillögurnar veittu trúverðugt svar við spurningu hugmyndaleitarinnar, hvort þær „samræmdust í meginatriðum stefnumörkun þjóðgarðsins og hvort framsetning þeirra væri greinagóð og lýsti vel inntaki hugmyndarinnar“.

Þeir sem hlutu viðurkenningar fyrir hugmyndir sínar og fá 200 þúsund krónur í verðlaun eru Catherine Eyjólfsdóttir, Sigrún Helgadóttir, Anna Ólafía Guðnadóttir, Kristján Gíslason og Gunnlaugur Þráinsson.

Í verðlaunahugmyndunum er meðal annars gert ráð fyrir að frekara tillit verði tekið til barna, þjóðgarðurinn, umhverfi hans og náttúra verði fært aftur í fyrra horf, hótel og veitingaaðstaða verði sett upp á Gjábakka, Veitingastaður verði settur upp í Þingvallabænum og skipulagt verði maraþonhlaup á Þingvöllum þar sem hlaupið yrði milli Evrópu og Ameríku.

Verðlaunatillögurnar verða til sýnis í Tjarnarsal Ráðhússins í Reykjavík fram til kl. 17 á morgun, sunnudag.- þj