Bjarni vissi ekkert um tölvuna í Alþingi

Bjarni Benediktsson, formaður Sjálfstæðisflokksins, segir það rangt að hann hafi vitað af tölvu í húsakynnum Alþingis. Tölvan fannst í febrúar á síðasta ári. Morgunblaðið greinir frá því í dag að grunur leiki á að tölvuþrjótar á vegum uppljóstrunarvefsíðunnar Wikileaks hafi komið tölvunni fyrir þar sem hún fannst.

Birgitta Jónsdóttir, þingmaður Hreyfingarinnar, fullyrðir að formenn Sjálfstæðisflokksins og Samfylkingarinnar hafi vitað um málið. „En svo vissu formenn Samfylkingarinnar og Sjálfstæðisflokksins um þetta," segir Birgitta. Þetta hafi komið fram á fundi forsætisnefndar í morgun. Bjarni segir þetta alrangt hjá Birgittu. Hann hafi aldrei vitað af þessu.

Jóhanna Sigurðardóttir forsætisráðherra er stödd erlendis og hefur ekki getað tjáð sig um málið.