Lög Jóhanns G. gætu verið spiluð áfram á Bylgjunni

Tónlistarmaðurinn Jóhann G. Jóhannsson hefur bannað Bylgjunni að spila lögin sín. Hann er ósáttur við tónlistarstefnu stöðvarinnar. Framkvæmdastjóri dagskrársviðs er undrandi á þessu útspili tónlistarmannsins.

„Það er búin að vera lengi viðverandi óánægja hjá tónlistarmönnum. Ég skrifaði grein í blöðin 2006 um þörf á að það kæmi upp önnur útvarpsstöð, hreinlega vegna þess að það er svo lítið spilað af íslenskri tónlist. Tónlistarmenn eru að gera frábæra hluti en jafnvel metnaðarfyllsta tónlistin fær ekki kynningu," segir Jóhann G. Jóhannsson. Hann hefur bannað Bylgjunni að spila lögin sín í mótmælaskyni yfir spilunarstefnu stöðvarinnar, sem hann segir einhæfa. Þetta eru lög á borð við Don"t Try To Fool Me, Dagar og nætur, Eina ósk, Hvers vegna varst"ekki kyrr og Traustur vinur.

Jóhann var óánægður þegar síðasta sólóplata hans frá 2009 þótti ekki vera á pari hjá tónlistarráði Bylgjunnar, sem samanstendur af starfsfólki stöðvarinnar. Þá gagnrýndi hann Bylgjuna í viðtali við Fréttablaðið fyrir að hleypa lagi sínu „Taktu þér tíma" ekki í gegn og gekk svo langt að segja að hann hefði verið niðurlægður af tónlistarráðinu. Jóhann vill breyta þeim farvegi sem íslensk tónlist þarf að ferðast um til að eiga möguleika á að komast í loftið. Hann fagnar því að Rás 2 hafi ákveðið að framvegis verði helmingur laganna sem hún spilar íslensk.

Jóhann vísar í hlustendakönnun á vegum Félags tónskálda og textahöfunda, FTT, frá síðasta sumri sem hefur ekki verið birt opinberlega. Þar kom í ljós að aðeins 14,4% svarenda voru ánægð með umfjöllun Bylgjunnar um íslenska tónlist á meðan hlutfall Rásar 2 var 50,5%.

Pálmi Guðmundsson, framkvæmdastjóri dagskrársviðs 365 miðla, segist vera undrandi á þessari „einhliða afstöðu Jóhanns G". „Þetta hefur ekki bara áhrif á Bylgjuna, heldur einnig á alla þá sem syngja og flytja tónlist hans auk útgefenda," segir hann. Pálmi útilokar ekki að Bylgjan haldi áfram að spila lög Jóhanns þrátt fyrir bannið.

„Jóhann G. hefur leigt höfundarréttinn að sínum lögum til Sambands tónskálda og eigenda flutningsréttar (STEF), sem við erum með samning við. Því getum við spilað lögin hans áfram," segir hann. „En það gæti þó vel farið svo að við förum að tilmælum hans."

Að sögn Pálma er hlutfall íslenskrar tónlistar á Bylgjunni hátt í 40% dag hvern. „Við erum í mjög góðum og reglulegum samskiptum við forkólfa tónlistargeirans og viljum hag íslenskrar tónlistar sem mestan. Það er óskemmtilegt að eiga í samskiptum sem þessum við Jóhann G. á opinberum vettvangi en hann er mikils metinn og einn mest spilaði listamaður Bylgjunnar. Mér persónulega finnst þetta illa ígrundað útspil af hans hálfu."

freyr@frettabladid.is