Segir alla styðja stjórnina

„Við vorum fyrst og fremst að fara yfir stöðuna almennt og fara yfir grundvöllinn og stjórnarsamstarfið og fá niðurstöðu í það til þess að það væri ekkert kjaftæði í gangi um það,“ sagði Steingrímur J. Sigfússon, formaður Vinstri grænna, að loknum þingflokksfundi í gærkvöldi.

Á fundinum ræddu þingmenn Vinstri grænna meðal annars þá samstarfsörðugleika sem upp hafa komið í flokknum undanfarið. Þeir endurspegluðust meðal annars í því að þrír þingmenn flokksins, þau Atli Gíslason, Ásmundur Einar Daðason og Lilja Mósesdóttir, sátu hjá við afgreiðslu fjárlaga fyrir jól.

Steingrímur sagði að nú gleðjist eflaust margir sem hafi haft miklar áhyggjur af heilsu ríkisstjórnarinnar undanfarna daga. Þeir geti nú tekið gleði sína á ný sem vilji stjórninni vel og að hún nái að vinna úr þeim ágreiningi sem uppi hafi verið.

„Við erum komin vel á veg í þeim efnum, og til þess þurfum við sterka og starfhæfa ríkisstjórn. Ég tel að niðurstaðan sé skýr í þeim efnum eftir daginn í dag, að stjórnin er það,“ sagði Steingrímur. Hann sagði niðurstöðu fundarins skýra. Engin breyting hafi orðið á stöðu Vinstri grænna sem ríkisstjórnarflokks, allir þingmenn flokksins styðji ríkisstjórnina.

„Við ætlum að halda áfram að funda og ræða þau stóru viðfangsefni sem við vitum að við erum ýmist með í höndunum eða við vitum að eru fram undan. Við ætlum að reyna að gefa okkur meiri tíma til að þétta raðirnar og tala saman, reyna að bæta okkar vinnubrögð hvað það snertir,“ sagði Steingrímur.

Hann sagði umræðuna sem hafi komist á flug í samfélaginu eftir afgreiðslu fjárlaganna hafa næstum verið barnalega. Ekkert tilefni hafi verið til að ætla að breytingar yrðu á stjórnarsamstarfi Vinstri grænna og Samfylkingarinnar.

Spurður hvort þingmennirnir þrír sem ekki studdu fjárlög ríkis­stjórnarinnar njóti trausts hjá öðrum þingmönnum flokksins sagði Steingrímur: „Já, við treystum hvert öðru, og ræðum það þá ef við þurfum að jafna einhvern ágreining, eða þurfum að gera athugasemdir við verk hver annars þá bara gerum við það. Það er okkar stíll.“ Hann segir ýmsan ágreining hafa verið jafnaðan á fundinum í gær, þó margt sé enn óleyst. Áfram verði fundað til að ræða þau stóru viðfangsefni sem nú blasi við.

Spurður hvort þremenningarnir muni áfram sitja í nefndum Alþingis fyrir hönd flokksins sagði hann það ekki hafa verið rætt á þessum fundi. Það verði mögulega rætt þegar nær dragi þingsetningu.

brjann@frettabladid.is