Neytendur óánægðir með óverðmerktar matvörur í Bónus

Ekki eru lengur verðmerkingar á kjúklingi í verslunum Bónuss. Ástæðan er úrskurður Samkeppniseftirlitsins frá í desember á síðasta ári þar sem verslunum Haga var bannað að taka við kjötvörum merktum með smásöluverði.

Óánægður viðskiptavinur hafði samband við Vísi og sagðist hafa lent í stökustu vandræðum í verslun Bónus í gær. Kjúklingurinn hefði ekki verið verðmerktur og hann hefði lent í vandræðum með að reikna út verðið út frá uppgefnu kílóverði. Hann sagðist undrast að neytendur mættu ekki vita hvað varan kostaði fyrr en á kassann væri komið.

Ástæðan fyrir þessu er úrskurður Samkeppniseftirlitsins frá í desember. Þar var sýnt frá á viðtækt samráð sjö kjötvinnslufyrirtækja og Haga í því skyni að blekkja neytendur. Vörur hafi verið auglýstar á afslætti í búðinni en verðið ákveðið af Högum og kjötvinnslufyrirtækjunum og áður en varan kom í búðina.

Lagt var bann við því að verslanir Haga gefi upp afslátt á kjötvörum nema um raunverulega lækkun frá gildandi smásöluverði sé að ræða. Högum var gert að greiða 270 milljónir króna í sekt en bannið við verðmerkingunum tekur gildi þann 1. júní.

Guðmundur Marteinsson, framkvæmdastjóri Bónus, segir ástæðuna fyrir því að kjúklingurinn sé nú óverðmerktur úrskurður Samkeppniseftirlitisins. „Við erum að búa okkur undir það sem gerist þann 1. júní. Við erum að reyna að finna út leið til að gera þetta læsilegt fyrir okkar viðskiptavini."

Guðmundur segir úrskurðinn hafa slæm áhrif fyrir neytendur. Nú þurfi kúnninn að reikna út í huganum hvað vörur kosti í staðinn fyrir að þær séu verðmerktar fyrirfram. Það séu fleiri vörur en bara kjúklingur sem sé nú óverðmerktur.

„Samkeppniseftirlitið vill að við setjum upp verðskanna inn í kælum en það kostar fleiri milljónir að setja slíkt upp," segir Guðmundur og bendir á að það hafi í för með sér kostnaðarauka. Hann gagrýnir úrskurð Samkeppniseftirlitsins og segir hann skapa vandamál bæði fyrir neytendur og búðirnar sjálfar.