Stefnir Mosfellsbæ vegna akstursþjónustu

Alexander Hrafnkelsson er með hrörnunarsjúkdóm í augunum, hann hefur hægt og sígandi misst sjónina og er nú lögblindur. Alexandar bjó áður í Reykjavík og hafði þar aðgang að leigubílaþjónustu á strætisvagnafargjaldi en þegar hann flutti til Mosfellsbæjar árið 2007 komst hann að því að þar hefði hann ekki aðgang að samsvarandi þjónustu. ,,Þeir eru að segja við mig hérna í Mosfellsbænum að þeir vilji ekki mismuna fötluðum í ferðaþjónustu sem ég tel að þeir séu að gera með því að bjóða mér bara ferðaþjónustu fatlaðra með þessum stóru bílum sem maður þarf að panta með sólarhringsfyrirvara sem bara hentar mér engan veginn" segir Alexander.

Hann hefur nú stefnt Mosfellsbæ þar sem hann telur bæjarfélagið hafa vanrækt lögboðnar skyldur sínar en samkvæmt lögum á sveitarfélag að gefa fötluðum íbúum tækifæri til að stunda vinnu og tómstundir ,,þeir setja mig eiginlega bara í stofufangelsi þannig að ef að konan mín er ekki til staðar til að keyra mig þá hef ég enga aðra úrlausn að gera".

Samsvarandi mál er nú til skoðunar hjá umboðsmanni Alþingis varðandi akstursþjónustu fyrir blindan einstakling í Kópavogi. Mál Alexanders hefur hlotið flýtimeðferð fyrir Héraðsdómi Reykjavíkur og segir formaður Blindrafélagsins að sú ferðaþjónusta sem boðið sé upp á í Mosfellsbæ og Kópavogi sé ekki fullnægjandi. ,,Hún í rauninni dæmir þá bara til einangrunar ef um einstaklinga er að ræða sem eru á virkum vinnualdri og geta lagt sinn skerf til samfélagsins og vilja vera virkir í samfélaginu þá hafa þessi tvö sveitafélög tekið þá ákvörðun að þeim skuli ekki vera gert það kleift" segir Kristinn Halldór Einarsson formaður Blindrafélagsins.