Krókódílar og snákar svamla um göturnar

Íbúum Rockhampton, 75 þúsund manna borgar í Queens­land-fylki í Ástralíu, hefur verið ráðlagt að halda sig frá vatnselgnum sem flæðir þar um götur. Yfirvöld óttast ekki aðeins að flóðin geti hrifsað fólkið með sér, heldur stafar einnig hætta af braki, snákum og jafnvel krókódílum sem leynst geta undir yfirborðinu.

Borgarstjórinn Brad Carter segir að íbúar hafi tilkynnt um óvenjumikinn fjölda snáka í borginni, sem ferðist um í leit að þurrlendi. Þá hafi saltvatnskrókódílar gert vart við sig og erfitt sé að greina þá frá braki. „Það ætti ekki að stafa almannahætta af dýrunum ef fólk heldur sig frá vatninu, en ef fólk fer út í þá er ekki hægt að tryggja öryggi þess,“ sagði Carter við dagblaðið The Australian.

Þessu til viðbótar hafa eitraðar körtur látið á sér kræla við borgina og búist er við að moskítóflugur sem bera með sér sjúkdóma verði næstar á vettvang.

Rockhampton er ein þeirra ríflega tuttugu borga og bæja sem hafa farið hvað verst út úr flóðunum sem hófust rétt fyrir jól. Flóðin kostuðu tvö mannslíf um helgina; veiðimaður hvarf nærri bænum Gladstone, sunnan Rockhampton, og kona um fertugt drukknaði á leið sinni yfir straumharða á í norðanverðu fylkinu. Alls er talið að tíu hafi látist vegna flóða í fylkinu frá því í nóvember.

Þá þurftu ríflega þúsund manns að leita skjóls í flóttamannamiðstöðvum um helgina og hundruð til viðbótar að yfirgefa heimili sín. Útlit er fyrir að heill mánuður geti liðið þar til svæðin sem nú eru blautust verða orðin nógu þurr til að íbúar þeirra geti snúið aftur til síns heima.

Úrhellisrigning var í fylkinu fyrir jól sem orsakar vatnavextina. Hápunktinum er talið hafa verið náð í gær en yfirvöld telja neyðarástandið þó hvergi nærri liðið hjá.

stigur@frettabladid.id