Hönnu Birnu var brugðið þegar hún sá könnunina

„Ég er þeirra skoðunar að það hafi verið rangt að ganga til þessara verkefna," sagði Hanna Birna Kristjánsdóttir í viðtali við Sigurjón M. Egilsson í útvarpsþættinum Sprengisandi í morgun. Þá var hún spurð hvort hún vildi draga aðildarumsókn að ESB til baka.

Stöð 2 og Vísir greindu frá því í gær að Hanna Birna mældist með mikinn stuðning samkvæmt skoðanakönnun sem stuðningsmenn hennar létu framkvæma.

Samkvæmt könnuninni nýtur hún mikils stuðnings í embætti formanns Sjálfstæðisflokksins, en hún er oddviti borgarstjórnarflokks Sjálfstæðisflokksins.

Hún sagði í viðtali í Sprengisandi að henni hefði verið brugðið þegar hún sá niðurstöðurnar. Aðspurð hvort hún hygðist bjóða sig fram sagðist Hanna Birna ekki vera búin að taka ákvörðun um það.

„En ég lofa að ég mun gera það fyrir landsfundinn," bætti hún hlæjandi við.

Hanna Birna segir að mótframboð gegn Bjarna Benediktssyni, formanni Sjálfstæðisflokksins, ekki honum til höfuðs. Þvert á móti dáist hún að Bjarna og störfum hans sem formaður.

„En við eigum að geta valið um ólíka einstaklinga - sem eru kannski með svipaðar skoðanir þó þeir hafi mismunandi áherslur," sagði Hanna Birna.

Þó hún sé sammála Bjarna um að það eigi að draga aðildarumsóknina til baka, þá er hún ósammála afstöðu Bjarna til Icesave-málsins, en hann mælti með frumvarpinu sem var fellt af þjóðinni síðasta vetur.

Hanna Birna sagðist vera búin að tilkynna Bjarna að hún íhugaði alvarlega sína stöðu.

„Bjarni er skilningsríkur maður og auðvitað hef ég talað við hann," svaraði hún þegar Sigurjón spurði hana út í samskipti þeirra á milli.