Umræðu um rafbíla vantar jarðtengingu

Rafbílavæðing Íslands tekur áratugi, segir Sverrir Viðar Hauksson, formaður Bílgreinasambandsins. Hann segir umræðu um framtíðartækni í samgöngum óraunhæfa á stundum.

„Menn verða að halda jarðsambandi í umræðunni um rafmagnsbílana. Þessi þróun á eftir að eiga sér stað, en hún verður ekki mæld í vikum eða mánuðum,“ segir Sverrir Viðar. Hann telur að orkugjöfum verði skipt út og nýir komi inn í takt við eðlilega endurnýjun bílaflota landsmanna.

„Ef eðlileg endurnýjun bílaflotans hér er um tíuþúsund bílar, miðað við 200 þúsund bíla flota, þá tekur þetta tuttugu ár.“

Þá segir Sverrir ljóst að enn séu óleyst vandamál sem leysa þurfi áður en stór skref verði stigin í rafbílavæðingu. „Það er ekki búið að finna upp rafgeyminn sem mun leysa orkuhluta rafbílanna.“ Sömuleiðis segir hann framleiðendur eiga eftir koma sér saman um staðla fyrir hleðslutengla bílanna.

Eins segir Sverrir að huga þurfi að fleiri hlutum eftir því sem rafbílum fjölgar. Þannig hafi bílaumboðið Hekla, þar sem hann starfar, haldið sérstakt námsskeið hjá Slökkviliði höfuðborgarsvæðisins, þegar innflutningur var hafinn á Mitsubishi Miev-rafbílum. Í rafbílum séu leiðslur sem varasamt kunni að vera að klippa í sundur lendi þeir í óhappi.

Þá segir Sverrir Viðar að koma verði í ljós hvort af því geti orðið að hér verði sett upp samsetningarverksmiðja fyrir rafmagnsjeppa, líkt og rætt var um í viljayfirlýsingu Northern Lights Energy og AMP Electric Vehicles.

„Ísland er bara svo lítið að það ber varla slíka verksmiðju,“ segir hann, hvað sem svo síðar kunni að verða komi til umskipunarhafnar og Kínasiglinga yfir Norðurpólinn. „Menn þurfa að sjá þetta í raunhæfu samhengi og það er voða lítið raunhæft í þessum yfirlýsingum sem gefnar hafa verið.“

„Allar þessar hástemmdu yfirlýsingar um rafbílana skapa óraunhæfar væntingar,“ segir Sverrir Viðar, en telur um leið ljóst að rafbílar eigi eftir að verða stór hluti af markaðnum, það taki bara lengri tíma en sumir hafi viljað vera láta. Hann segir því ótímabært að hlaupa til og koma upp dreifikerfi sem síðan verði komið til ára sinna þegar loksins verða nógu margir bílar í landinu til að nýta það. olikr@frettabladid.is