Hættir á þingi til að læra siðfræði

„Þetta er ákvörðun sem er tekin af mjög vandlega hugsuðu máli," segir Þórunn Sveinbjarnardóttir, sem tilkynnti í dag að hún segði af sér þingmennsku. Spurð hvað komi til segist hún hafa verið að bræða með sér hugmyndina í nokkurn tíma.

„Ég er búin að vera á þingi í tólf ár. Mig langar að breyta til, enda ætlaði ég aldrei að gera þingmennsku að ævistarfi mínu," segir Þórunn sem hefur nám í heimspeki og siðfræði í Háskóla Íslands á næstu dögum. Hún hefur því skráð sig í skólann í sumar.

Spurð hvort hún sé sátt við Samfylkinguna svarar Þórunn: „Afar sátt."

Þórunn segist ekki hætt afskiptum af stjórnmálum þó hún sé hætt á þingi. Lúðvík Geirsson, fyrrverandi bæjarstjóri Hafnarfjarðar, tekur sæti Þórunnar að óbreyttu.