Fjórir í varðhaldi vegna skotárásar - lögreglurannsókn lokið

Hæstiréttur sneri í dag við gæsluvarðhaldsúrskurði yfir tveimur mönnum sem eru grunaðir um aðild að skotárás í Bústaðahverfi á aðfangadag.

Mennirnir sátu í varðhaldi til 4. janúar síðastliðins. Þá var lögð fram krafa um fjögurra vikna áframhaldandi gæsluvarðhald yfir þeim en á hana var ekki fallist í Héraðsdómi Reykjavíkur. Hæstiréttur sneri niðurstöðunni við í dag. Mennirnir sitja því í varðhaldi til 1. febrúar.

Fyrir voru tveir aðrir karlar í haldi lögreglu vegna sama máls en þeir voru líka handteknir á aðfangadag og var gæsluvarðhald yfir þeim síðan framlengt um fjórar vikur þann 4. janúar, eða til 1. febrúar.

Lögreglan segir að fjórmenningarnir, sem eru á þrítugs- og fertugsaldri og hafa allir áður komið við sögu hjá lögreglu, hafi játað aðild sína að málinu. Rannsókn þess er lokið en málið var sent embætti ríkissaksóknara til frekari meðferðar.