Í öndunarvél eftir slys á æfingu

Karlmaður slasaðist alvarlega á æfingu Íslenska dansflokksins í Borgarleikhúsinu í gær. Honum er núna haldið sofandi í öndunarvél á gjörgæsludeild Landspítalans í Fossvogi, samkvæmt upplýsingum frá vakthafandi lækni.

Maðurinn er dansari hjá Íslenska dansflokknum. Leikritinu Ofviðrinu, sem er samstarfsverkefni Borgarleikhússins og Íslenska dansflokksins, og átti að sýna síðar um kvöldið, var frestað.

Magnús Geir Þórðarson, leikhússtjóri í Borgarleikhúsinu, segir í samtali við Vísi að ekki sé hægt að greina frá tildrögum slyssins að svo komnu máli.