Ari Edwald: Framhald af áramótaskaupinu

Ari Edwald, forstjóri 365 miðla, segir tilboð Páls Magnússonar útvarpsstjóra um að kaupa sýningarréttinn að HM í handbolta koma of seint til að hægt sé að taka það alvarlega.

„Ég lít frekar á þetta sem framhald af áramótaskaupinu," segir Ari.

„Við erum búnir að selja áskriftir á stöðina síðan í haust og allt í fullum gangi. Mótið er að byrja í næstu viku og þegar ég gerði Ríkisútvarpinu tilboð í að kaupa af þeim hluta af HM í fótbolta haustið 2009 tók það fram í maí að ganga frá samningum þar um."



Ekki alvöru tilboð

Ari bendir á að Páll sendi tilboðið á alla fjölmiðla samtímis og það var sent 365. „Hann hugsar þetta ekki sem alvöru tilboð heldur sem eitthvað sprell til þess að reyna að spilla þeirri góðu stemningu sem er að skapast fyrir mótið."

Hann segir ennfremur að það viti allir sem til þekkja að 365 hafi ávallt gert stórviðburðum á íþróttasviðinu mjög góð skil. Hann bendir í því sambandi á þá umgjörð sem 365 skapaði um HM í fótbolta 2006. „Við erum auk þess að standa betur að þessu en áður hefur verið gert og sýnum miklu fleiri leiki á mótinu en RÚV hefur getað hingað til."



Frekar stytta biðraðir eftir mat

Ari bendir einnig á að gerðir hafi verið samningar um kostun og auglýsingar í kringum mótið og því hafi RÚV enga möguleika á því að afla frekari tekna í kringum mótið.

„Ef það er þannig að ríkið hafi fundið tugi milljóna króna núna til þess að verja í það að kaup sýningarrétt á handbolta án þess að hafa þar tekjur á móti, þá spyr maður sig hvort það standi velferðarstjórninni ekki nær ef það á peninga aflögu að sjá til þess að fólk fái að borða í landinu. Þessi fjárhæð sem verið er að tala um myndi klárlega duga til þess að stytta þær biðraðir um helming sem verið hafa í höfuðborginni eftir mat síðustu misseri."

Hinsvegar segir Ari að RÚV gæti vel tekið upp viðræður við 365 um að kaupa sýningarréttinn að mótinu árið 2013 sem 365 á réttinn að.

„Það má skoða það, en í sjálfu sér þyrfti RÚV ekkert að koma að því máli. Ef ríkið vill greiða okkur peninga til þess að minnka kostnað við kaup á þessum réttindum þá er hægt að opna dagskránna hér líka." Það væri einnig eðlilegra út frá samkeppnissjónarmiðum að mati Ara að ríkisstyrkur af þessu tagi væri ekki bundinn við Ríkisútvarpið.



Áskrifendur eru ánægðir

„Mér finnst það líka stormur í vatnsglasi allt þetta tal um mikla óánægju, því við finnum hana ekki frá fólki sem er að kaupa sér áskrift," segir Ari og bendir á að áskrift að stöðinni í heilan mánuð kostar jafn mikið og miði á einn venjulegan leik á mótinu.