Ef allt klikkar þá fer ég bara aftur í lögfræðina

„Við erum lítið fyrirtæki og höfum hugsað okkur að vera það áfram. Við einbeitum okkur að fáum verkefnum og viljum meina að við framleiðum ódýrt sjónvarpsefni vel,“ segir Hugi Halldórsson framleiðandi.

Hugi stofnaði fyrr á árinu framleiðslufyrirtækið Stórveldið og á skömmum tíma hefur fyrirtækið vakið þó nokkra athygli. Meðal sjónvarpsþátta sem fyrirtækið hefur framleitt eru Mannasiðir Gillz og Andri á flandri. Fram undan eru svo nýir matreiðsluþættir Rikku og Týnda kynslóðin sem báðir hefja göngu sína á Stöð 2 á næstunni.

„Stórveldið er reyndar búið að vera til lengi. Þetta er eldgamalt fyrirtæki sem ég stofnaði utan um vinnuna mína þegar ég var í sjónvarpinu. Þá fannst mér voða fyndið að eins manns fyrirtæki héti Stórveldið,“ segir Hugi sem hefur síðustu sex ár starfað hjá Saga Film. Hugi á og rekur Stórveldið og er framleiðandi þess. Kristófer Dignus er framleiðslustjórinn og þriðji maðurinn er Lúlli klippari.

Hugi segist hafa verið ánægður í starfi hjá Saga Film þar sem hann vann við gerð auglýsinga. Tækifærið til að fá að vinna við gerð sjónvarpsefnis hafi þó reynst of freistandi. „Það getur verið lýjandi að vinna við auglýsingar, það þarf allt að gerast svo hratt. Sjónvarpið tekur lengri tíma og er rólegra. Ætli ég hafi ekki bara unnið yfir mig í auglýsingum.“

Þó að Hugi hafi starfað sem framleiðandi um árabil muna flestir eftir honum sem Ofurhuga úr sjónvarpsþáttunum 70 mínútum. „Ég er náttúrulega æskuvinur Audda af Króknum og honum fannst tilvalið að fá mig inn í hugmyndavinnuna í 70 mínútum. Svo þróaðist það út í að ég fór að taka þátt í falinni myndavél og úr því varð Ofurhugi til. Ég hætti sem sagt í lögfræðinni til þess að leika í falinni myndavél fyrir Audda. Ef allt um þrýtur með þetta núna þá fer ég bara aftur í lögfræðina.“

Stofnun Stórveldisins er þó ekki það eina sem drifið hefur á daga Huga nýlega. Hann og kærastan, Ástrós Gunnlaugsdóttir, eignuðust sitt fyrsta barn í síðasta mánuði. „Svo er konan nýbúin að skila stjórnarskrárfrumvarpi svo það er nóg að gera.“

hdm@frettabladid.is