Dóttir bæjarstjórans á bíl Kópavogsbæjar

Bíll sem Kópavogsbær leggur Guðrúnu Pálsdóttur bæjarstjóra til er notaður af nítján ára dóttur hennar. Sjálf notar Guðrún stundum aðra bíla sem bærinn á.

Guðrún kveðst hafa rætt við endurskoðendur og lögfræðinga um notkunina af bílnum sem sé hluti af launakjörum hennar.

„Þeir segja að svo framarlega sem það sé ekki tekið fram í ráðningar­samningi að afnotin af bifreiðinni séu bundin við eitt ákveðið nafn þá geti nánasta fjölskylda keyrt hana," útskýrir Guðrún.

Hafsteinn Karlsson, forseti bæjar­stjórnar, kveðst hafa heyrt að stundum noti Guðrún bíla úr þjónustuveri bæjarins.

„Mér skilst að hún hafi eitthvað gert það þegar hún hefur ekki verið á bílnum. Mér finnst eðlilegt að hún noti bílinn sem hún hefur til umráða. Við sköffum bíl og þá er auðvitað ætlast til að sá bíll sé notaður í þágu bæjarins," segir Hafsteinn sem þó undirstrikar að engin skilmálar í ráðningar­samningi bæjarstjórans komi í veg fyrir að hún noti bílinn í einkaerindum.

Guðrún segir að sé hún ekki á umræddum bíl, Toyota Corolla árgerð 2006, sé hún iðulega á jeppa í sinni eigu í vinnunni. Í nokkur skipti hafi hún notað bíla úr þjónustuverinu. Þá hafi aðrir starfsmenn oftast farið með henni í bíl og hún þá ein kvittað fyrir notkuninni.

„Ég get fullyrt að ég hef ekki lagt í vana minn að misnota eigur Kópavogsbæjar. Ég mun gæta þess að ég mun aldrei aftur kvitta fyrir einum eða neinum bíl úr þjónustuverinu þegar ég fer á fundi með öðrum starfsmönnum," segir Guðrún.

Rekstur bíls bæjarstjórans er greiddur úr bæjarsjóði - þar með talið bensín sem hún hefur sérstakt bensínkort fyrir. Dóttir hennar sækir framhaldsskóla í Reykjavík og er stundum á Toyotunni. Hún getur einnig notað bensínkortið. „Ef dóttir mín hefur þurft að setja bensín á bílinn þá er það undantekningar tilfelli," segir bæjarstjórinn. -gar