Landsbjörg býst við góðri flugeldasölu í ár

Flugeldasala fer í fullan gang á morgun og býst Landsbjörg við góðri sölu þetta árið. Ný skotgleraugu eru komin á markaðinn til að mæta kröfuhörðum tískuunnendum.

Einungis fjórir dagar eru þangað til landsmenn sprengja árið 2011 í burtu og bjóða 2012 velkomið og eru væntanlega margir sprengiglaðir áramótaunnendur komnir í startholurnar fyrir flugeldakaupin. Framkvæmdastjóri Slysavarnarfélagsins Landsbjargar segir mikla samkeppni vera á flugeldamarkaðnum, en að hún haldi Björgunarsveitunum við efnið. Kristinn er þó á því að landsmenn eigi að kaupa flugelda sína af björgunarsveitunum

„Okkar framlag til almennings skiptir miklu máli, eins og hefur sýnt sig í veðrinu undanfarna daga. Það er gott að fá aðstoð frá björgunarsveitunum," segir Kristinn Ólafsson, framkvæmdastjóri Landsbjargar.

Troðni, Tralli, Trausti og Trölli og svo má ekki gleyma Trítil sem mun líklega vera kærkomin viðbót við flóruna

„Það má finna ýmislegt smádót sem yngri kynslóðin gæti haft gaman af," segir Kristinn.

Ný skotgleraugu til að vernda augu landsmanna eru líka komin á markaðinn.

„Það er svolítill stæll yfir gleraugunum í ár. Svo hvetjum við auðvitað foreldra til þess að láta börn sín vera með gleraugu þegar flugeldunum er skotið upp," segir Kristinn.

Það eru ekki bara flugeldarnir sem kæta á gamlárskvöld því áramótabrennurnar gleðja líka lítil hjörtu og verða tíu brennur á höfuðborgarsvæðinu þetta árið. Stórar brennur verða við Ægisíðu, Rauðavatn, Geirsnef og Gufunes og svo verða litlar brennur á víð og dreif um höfuðborgina. Það eru ekki auðvitað ekki bara borgarbörnin sem fá að njóta og standa vestfirðirngar sig mjög vel þetta árið en alls þrettán brennur verða á boðstólnum þar.