Hækka leikskólagjald námsmanns um 110%

Þórdís Rúriksdóttir, móðir tveggja ára stúlku í Hraunvallaleikskóla í Hafnarfirði, sér nú fram á að leikskólagjald fyrir dóttur hennar hækki úr 21 þúsund krónum í 44 þúsund á mánuði.

Bæjarstjórn Hafnarfjarðar ákvað 17. desember að afnema allan núverandi afslátt í gjaldskrá leikskóla bæjarins frá 1. febrúar. Magnús Baldursson, fræðslustjóri Hafnarfjarðar, segir áherslu lagða á að halda átta stunda vistun fyrir öll börn. Þau pláss séu í raun niðurgreidd um 85 prósent. Hins vegar verði innheimtur raunkostnaður fyrir alla vistun sem boðið sé upp á þar fram yfir. Það er einmitt þess vegna sem breytingin kemur illa við Þórdísi.

„Ég er bæði í vinnu og námi. Stundataflan mín er þannig að einn dag í viku þarf dóttir mín níu og hálfan tíma á leikskólanum. Þar af leiðandi verð ég að borga fyrir níu og hálfs tíma vistun allan mánuðinn. Það myndi kosta um 21 þúsund krónur núna en mun, eftir því sem ég kemst næst, kosta um 44 þúsund krónur eftir breytinguna,“ segir Þórdís.

Magnús segir breytinguna vissulega munu leiða til verulegra hækkana fyrir suma. Ætlunin sé hins vegar að veita afslátt vegna umframstundanna á leikskólum bæjarins. Hann bendir á að í núverandi kerfi fái einstæðir foreldrar og námsmenn sjálfkrafa afslátt.

„Tekjur skiptu engu máli eða hvernig aðstæður voru að öðru leyti og engir aðrir fengu þennan afslátt. Hins vegar vitum við mæta vel, ekki síst núna í hruninu þegar fólk er að missa vinnuna, að það fólk í sambúð hefur sumt ekkert síður þörf fyrir að fá þennan afslátt. Þetta er því ekki eingöngu hugsað sem sparnaðaraðgerð heldur til að gæta jafnræðis,“ segir fræðslustjórinn og upplýsir að breytingunni verði frestað til 1. mars þar sem enn sé ekki ákveðið við hvaða tekjur afslátturinn verði miðaður.

Þórdís segir sína stöðu reyndar nokkuð góða þar sem maðurinn hennar sé með ágætis laun. „Ég efast um að við fáum þennan afslátt sem á að veita enda sýnist mér að fólk muni þurfa að vera ansi illa statt til þess. En ég er ekki bara að hugsa um mig heldur aðra líka, til dæmis starfsmenn leikskólanna sem hafa hingað til fengið afslátt en verða nú settir í hóp með öllum öðrum. Ég óttast að þetta verði til þess að hæfir starfsmenn hætti,“ segir Þórdís Rúriksdóttir.

gar@frettabladid.is