Sjö mánaða fangelsi fyrir umfangsmikil fjársvik

Tuttugu og fjögurra ára karlmaður hefur verið dæmdur í sjö mánaða fangelsi fyrir umfangsmikil fjársvik en hann sveik út vörur og þjónustu fyrir milljónir króna hjá ýmsum fyrirtækjum á höfuðborgarsvæðinu. Hann þarf að greiða á þriðju milljón króna í skaðabætur til fórnarlamba sinna.

Maðurinn sveik út vörurnar með því að segjast hafa heimild til að eiga viðskipti í nafni fyrirtækis sem hann tengdist þó á engan hátt.

Til að mynda fékk maðurinn afhent bensín-inneignarkort hjá N1 en hann sagðist vera sækja kortið í umboði fyrirtækisins. Hann tók svo út vörur í verslunum N1 á höfuðborgarsvæðinu fyrir um 100 þúsund krónur á innan við tveimur klukkutímum.

Maðurinn blekkti einnig starfsmenn Olís á höfuðborgarsvæðinu og tók út vörur og þjónustu fyrir rúmlega 800 þúsund krónur á  mánaðartímabili. Maðurinn kvittaði ávallt undir reikningana með eigin nafni.

Þá seldi hann uppþvottavél og ísskáp frá fólki sem hann leigði íbúð hjá og sveik einnig út 600 þúsund krónur út úr fólki sem hugðist taka íbúðina á leigu.

Maðurinn játaði brot sín fyrir dómi en dómari segir að brot hans hafi verið umfangsmikil og varði verulegum fjárhæðum. Hann braut skilorð með brotunum og þykir dómara 7 mánaða fangeli hæfileg refsing. Honum til málsbóta játaði hann brot sín og samþykkti að greiða skaðabótakröfur. Þá sé einnig nokkuð liðið frá því að hann framdi flest brotin.