Sýnatöku úr íbúum vegna díoxíns lokið

Fyrsta hluta heilsufarsrannsóknar sóttvarnalæknis vegna díoxínmengunar frá sorpbrennslum á Ísafirði, Kirkjubæjarklaustri og Vestmannaeyjum er lokið. Ákveðið var að taka sýni úr íbúum til að ganga úr skugga um hvort díoxín, sem greinst hefur í skepnum, afurðum og fóðri í nálægð við sorpbrennsluna Funa á Ísafirði, hefði náð til íbúa.

Haraldur Briem sóttvarnalæknir segir að sýnatakan hafi gengið að óskum, þrátt fyrir að hún hafi dregist nokkuð frá því sem upphaflega var áformað. Íbúar hafi sýnt mikinn samstarfsvilja. Næsta skref er að koma blóðsýnum, auk brjóstamjólkursýnis, á rannsóknastofu erlendis til greiningar. Niðurstaðna er að vænta eftir fimm til sex vikur.

„Þetta er ekki stór hópur. Sennilega tugur manns sem gaf blóðsýni og ein kona sem gaf brjóstamjólkursýni,“ segir Haraldur. „Síðan verða tekin töluvert fleiri viðmiðunarsýni; tíu á Ísafirði og tíu á höfuðborgarsvæðinu í framhaldinu. Þetta verður talsvert stór hópur manna.“

Hluti af rannsókninni er að kanna blýmagn í hári, en ef blý mælist er líklegt að einnig sé þar að finna díoxín. Sérstök rannsókn á blýmagni í hári er síðan fyrirhuguð á vegum Háskóla Íslands og Matvælastofnunar; sótt hefur verið um styrki til þeirrar rannsóknar, sem gæti hafist eftir nokkra mánuði.

Meðal þeirra sem gáfu sýni á Ísafirði eru hjónin á Efri-Engidal, þar sem díoxín mældist upphaflega í kúamjólk. Einnig í hópnum er dóttir þeirra, sem gaf auk þess brjóstamjólkursýni, en hún bjó hjá foreldrum sínum á meðan hún gekk með barnið. Einn starfsmaður sorpbrennslunnar Funa gaf sýni.

Haraldur ítrekar að hann eigi ekki von á að fólk hafi orðið fyrir heilsutjóni af völdum mengunarinnar. Hins vegar snúi rannsóknin, sem á sér enga hliðstæðu hér á landi, að því mikilvæga atriði að leita upplýsinga um hvað gerðist í sveitarfélögunum þremur.

Rannsóknin fellur inn í allsherjarúttekt þar sem Umhverfisstofnun mun meðal annars gera sérstaka rannsókn á jarðvegi í nágrenni við sorpbrennslurnar, auk annarra svæða þar sem er mengandi starfsemi. Sýnatakan er áformuð í maí næstkomandi.svavar@frettabladid.is