Haakonsen: Veigar Páll er besti sóknarmaður norsku deildarinnar

Veigar Páll Gunnarsson skrifaði í gær undir þriggja ára samning við norska úrvalsdeildarliðið Vålerenga og er íþróttastjóri félagsins sannfærður um að Veigar sé besti sóknarleikmaður deildarinnar.

„Við erum mjög ánægðir. Í fyrsta lagi er Veigar Páll að okkar mati einn af bestu sóknarleikmönnum norsku deildarinnar. Við völdum að reyna að ná í þann besta í stað þess að fá leikmann til skemmri tíma,“ sagði Truls Haakonsen íþróttastjóri norska fótboltaliðsins Vålerenga eftir að félagið keypti hann frá Stabæk í gær.

Veigar hafnaði fyrsta tilboði félagsins og vildi frekar fara til meistaraliðs Rosenborgar en á fimmtudaginn fóru hlutirnir að gerast hratt.

„Þegar menn eru að ræða saman þá eru menn ósammála þar til að menn eru sammála. Á fimmtudagskvöldið náðum við að ljúka þessu. Við höfum átt í vandræðum með að skora og gefa stoðsendingar, það skýrist að mestu leyti af meiðslum leikmanna á undirbúningstímabilinu,“ bætti Haakonsen við.