Sunneva og Snorri Páll sýknuð

Þau Sunneva Ása Weisshappel og Snorri Páll Jónsson voru sýknuð í Héraðsdómi Reykjavíkur í morgun en þau voru ákærð fyrir að óhlýðnast tilmælum lögreglunnar og svo átti Snorri að hafa hrækt á lögreglumann.

Atvikið átti sér stað í maí 2009.

Í skýrslu lögreglu kom fram að ástæða afskiptanna hafi verið sú að Snorri hafi hrækt tvisvar á bifreiðina sem lögreglumennirnir óku niður Laugaveginn. Hafi þeir viljað ræða við Snorra, fá upp gefið nafn hans og biðja hann um skýringar á þessari háttsemi. Þá hafi verið ætlunin að kanna ástand Snorra, en hann hafi verið sjáanlega ölvaður samkvæmt lögregluskýrslunni.

Hafi annar lögreglumannanna tekið í hönd Snorra og leitt hann í átt að lögreglubifreiðinni. Sunneva átti þá að hafa brugðist illa við og reynt að draga Snorra á brott. Hún hafi ekki sinnt fyrirmælum lögreglumannanna um að láta af því, en reynt að ryðja þeim frá. Þá hafi verið tekin ákvörðun um að handtaka þau bæði.

Þau voru síðan færð í lögreglubifreiðina og ekið í átt að lögreglustöðinni við Hverfisgötu. Eftir að inn í bifreiðina kom átti Snorri að hafa hrækt í andlit þess lögreglumanns, sem sat við hlið hans í bifreiðinni.

Bæði neituðu þau alfarið sök. Í niðurstöðu dómsins kemur fram að við aðalmeðferð málsins hafi komið fram að atvikið átti sér stað í húsasundi og á gangstétt framan við Laugaveg 64 og 66, en ekki við hús nr. 76, eins og fram kom í frumskýrslu lögreglu. Þá var verknaðarlýsingu Sunnevu ábótavant og fyrir vikið var hún sýknuð.

Þá var Snorri sýknaður af því að hafa hrækt á lögreglumanninn vegna eindreginnar neitunar hans og Sunnevu.

Snorri Páll Jónsson var einn níumenninganna sem ákærðir voru fyrir árás á Alþingi og síðar sýknuð.