Pabbinn og frændinn áfram í gæsluvarðhaldi

Mennirnir tveir, sem setið hafa í gæsluvarðhaldi vegna gruns um gróft kynferðislegt ofbeldi gagnvart dreng á áttunda ári voru í dag í Héraðsdómi Reykjaness úrskurðaðir í áframhaldandi gæsluvarðhald til 14. apríl að kröfu lögreglunnar á höfuðborgarsvæðinu og er það gert á grundvelli rannsóknarhagsmuna.

Eins og fram hefur komið er um að ræða föður og frænda drengsins. Mennirnir voru handteknir í síðustu viku og í framhaldinu voru þeir úrskurðaðir í gæsluvarðhald sem nú hefur verið framlengt eins og áður sagði. Annar mannanna hefur ákveðið að kæra úrskurðinn til Hæstaréttar en hinn hefur ekki gert upp hug sinn í þeim efnum.