Á annan tug innherjasvikamála til rannsóknar

Á annan tug innherjasvikamála eru til rannsóknar hjá sérstökum saksóknara. Brot Baldurs Guðlaugssonar, fyrrverandi ráðuneytisstjóra, eru stórfelld að mati Héraðsdóms, en hann var dæmdur í tveggja ára fangelsi fyrir innherjasvik þegar fyrsti dómurinn í málum sérstaks saksóknara féll í dag.

Baldur Guðlaugsson, fyrrverandi ráðuneytisstjóri í fjármálaráðuneytinu, var dæmdur í tveggja ára óskilorðsbundið fangelsi fyrir innherjasvik og brot í opinberu starfi fyrir að selja hlutabréf sín í Landsbankanum fyrir 192 milljónir króna rétt fyrir hrun eftir að hafa setið fundi sérstakrar nefndar um fjármálastöðugleika þar sem ræddar voru trúnaðarupplýsingar um stöðu bankans og fjármálakerfisins alls. Á fundunum voru rædd þau áform stjórnvalda að bjarga innistæðueigendum, en ekki hluthöfum bankanna.

Fjöldi vitna kom fyrir dóminn, eins og Bolli Þór Bollason sem sat sömu fundi og Baldur og taldi sér ekki heimilt að selja bréf sín í bönkunum vegna þeirrar vitneskju sem hann bjó yfir.

Ákæruvaldið fór fram á tvö ár, en refsiramminn býður upp á sex ára fangelsi ef sakir eru miklar. Í dómsorði Héraðsdóms segir: „Ákærði hefur ekki áður gerst brotlegur við lög. Brot ákærða eru stórfelld og brotaandlag hátt. Með broti sínu misnotaði ákærði stöðu sína sem opinber starfsmaður."

Ekki hefur náðst í Karl Axelsson, verjanda Baldurs í dag. Dómnum verður áfrýjað en málið er í raun einstakt, því dæmi í íslenskri réttarsögu um sambærileg brot, þ.e innherjasvik, eru ekki mörg. Niðurstaða Hæstaréttar mun því veita mikilvæga leiðsögn, en sérstakur saksóknari segir að á annan tug innherjasvikamála séu nú til rannsóknar hjá embættinu.

Búast má við að a.m.k einn dómari Hæstaréttar verði vanhæfur til að fjalla um mál Baldurs, Jón Steinar Gunnlaugsson, hæstaréttardómari, en hann og Baldur ráku saman lögmannsstofu árum saman. Náinn kunningsskapur er talinn nægja sem vanhæfisástæða að mati sérfræðinga í hæfisreglum, en í Hæstarétti sitja þó fleiri sem sennnilega þyrftu að skoða hæfi sitt, gamlir skólabræður og kunningjar úr stéttinni.