Tugir kílóa af fíkniefnum teknir í íslenskri höfn

Karlmaður á fimmtugsaldri var handtekinn í Leifsstöð í nótt grunaður um að vera höfuðpaur í einu umfangsmesta fíknefnamáli ársins. Hann er annar maðurinn sem er handtekinn vegna málsins sem hefur verið til rannsóknar í marga mánuði og snýst um innflutning á verulegu magni af fíkniefnum.

Í byrjun mánaðarins lagði lögreglan hald á sendingu sem kom hingað til lands með gámaskipi frá Hollandi. Í sendingunni voru, samkvæmt heimildum fréttastofu, einhverjir tugir kílóa af fíkniefnum, meðal annars e-pillur, kókaín, amfetamín og sterar.

Sendingin var stíluð á lítið heildsölufyrirtæki á höfuðborgarsvæðinu og skömmu síðar var einn starfsmaður þess handtekinn og úrskurðaður í gæsluvarðhald. Það var gert þann. 11 október síðastlinn. Athygli vekur að þessi starfsmaður er á sextugsaldri, nýorðinn afi, og hefur aldrei komið við sögu lögreglu áður, sem þykir nokkuð óvenjulegt í málum sem þessum. En rannsókn lögreglu var ekki lokið, því höfuðpaurinn, sá sem sendi efnin hingað til lands, var enn ófundinn.

Fljótlega fóru að böndin að berast til Spánar. Þar er búsettur Íslendingur á fimmtugsaldri sem áður hefur fengið dóma fyrir fíkniefnainnflutning og er grunaður um að hafa skipulagt innflutninginn með gámaskipinu frá Hollandi. Hann flaug til Íslands í nótt. Lögreglan beið eftir honum og handtók hann um leið og vélin lenti. Hann verður úrskurðaður í gæsluvarðhald og því eru nú tveir í haldi vegna málsins.

Samkvæmt heimildum fréttastofu er rannsókn lögreglu afar umfangsmikil og hefur meðal annars verið stuðst við símhleranir. Enda er þetta langstærsta fíkniefnamál sem komið hefur upp á árinu.