Laugardalshrottinn ákærður

Ríkissaksóknari hefur ákært karlmann á þrítugsaldri fyrir Héraðsdómi Reykjavíkur fyrir hrottalega líkamsárás í Laugardal í Reykjavík síðastliðið haust.

Maðurinn er ákærður fyrir að hafa ráðist með ofbeldi á stúlku sem þá var sextán ára á göngustíg í Laugardalnum í Reykjavík. Árásin átti sér stað mánudaginn 11. október 2010. Manninum er gefið að sök að hafa slegið stúlkuna ítrekað með hörðu áhaldi í höfuð og tekið hana hálstaki og þrengt að þar til hún missti meðvitund. Afleiðingar ofbeldisins urðu þær að stúlkan hlaut langan skurð á hnakka hægra megin, djúpan langan skurð á enni, brot á nærkjúku hægri vísifingurs og víða mar.

Maðurinn var handtekinn um það bil mánuði eftir ofbeldisverkið. Hann játaði í kjölfarið að hafa ráðist á stúlkuna. Málið vakti þá mikinn óhug, ekki síst þar sem árásin átti sér stað um miðjan dag. Stúlkan komst við illan leik upp á Suðurlandsbraut, þar sem vegfarandi kom henni til aðstoðar og hringdi á sjúkrabíl. Árásin var fólskuleg og algjörlega fyrirvara- og tilefnislaus. Maðurinn bar við minnisleysi vegna fíkniefnaneyslu í skýrslutökum hjá lögreglu.- jss