Lyf yfirvalda ekki þau bestu

Kvensjúkdómalæknar sem látið hafa bólusetja dætur sínar gegn HPV-sýkingum, sem geta valdið leghálskrabbameini, völdu annað lyf en það sem yfirvöld nota til að bólusetja stúlkur með í dag. Gríðarlegur verðmunur gerði útslagið um hvort bóluefnið var valið.

HPV-bólusetning fyrir tólf ára stúlkur hófst í haust og verður í framtíðinni hluti af almennum bólusetningum barna.

Bóluefnið sem almennt er notað kallast Cervarix en einnig er á markaðnum bóluefnið Gardasil, sem veitir ennfremur vörn gegn kynfæravörtum.

Eftir útboð á vegum Landslæknisembættisins kom í ljós að fyrrnefnda lyfið var um 70 prósentum ódýrara, og það því valið.

„Ég held að ég geti fullyrt fyrir hönd minna félagsmanna að við hefðum öll frekar valið Gardasil þar sem það veitir betri vörn gegn kynfæravörtum. Því til stuðnings get ég sagt að þau okkar sem hafa látið bólusetja okkar dætur, við höfum notað Gardasil, þó það sé aðeins dýrara en Cervarix," segir Hulda Hjartardóttir, formaður íslenskra fæðingar- og kvensjúkdómalækna.

Þórólfur Guðnason, yfirlæknir á sóttvarnasviði embættis Landlæknis bendir á að ákveðin lög gilda um útboð og kaup á vegum hins opinbera og því hafi ekki einfaldlega verið hægt að velja annað lyfið.

„Samkvæmt þessum reglum er það ekki hægt. Þá hefðum við fengið á okkur kærur," segir Þórólfur og bætir við að ef ekki hefði verið farið í útboð hefði þurft að kaupa annað bóluefnið á markaðsvirði, sem hefði kostað álíka mikið og allar ungbarnabólusetningar sem nú eru í gangi.

„Ég tel mjög sterk rök hníga að því að þá hefði engin bólusetning farið af stað gegn HPV hér á Íslandi í þessum efnahagsþrengingum sem nú eru," segir Þórólfur.

Cervarix veitir góða vörn gegn HPV-sýkingum og telja læknar því mun betri kost að velja það bóluefni en að sleppa bólusetningu.