Sprengiefnið enn ófundið

Um fjögur hundruð kíló af sprengiefni sem stolið var í síðustu viku eru enn ófundin. Lögreglunni hafa borist nokkrar ábendingar sem hún skoðar. Sprengiefnið var á vinnusvæði í Þormóðsdal ofan við Hafravatn. Efnið var geymt í tveimur gámum sem voru vel læstir. Þjófarnir virðast hafa undirbúið sig nokkuð vel en þeir notuð meðal annars logskurðartæki til að komast inn í gámana.

Sprengiefnið var á vinnusvæði í Þormóðsdal ofan við Hafravatn. Það var í eigu verktakafyrirtækis sem er með grjótnámu á svæðinu þar sem reglulega er sprengt.

Sprengiefnið var geymt í tveimur gámum sem voru kirfilega læstir. Þjófarnir virðast hafa undirbúið sig nokkuð vel en þeir notuð meðal annars logskurðartæki til að komast inn í gámana.

Lögregla segir vörslu á sprengiefnisins algjörlega í samræmi við reglur Vinnueftirlitsins.

Þjófarnir höfðu á brott með sér um þrjú hundruð kíló af dýnamíti og rúmlega hundrað kíló af sprengikjarna. Þeir tóku einnig með sér töluvert magn af hvellettum.

Þrátt fyrir að um mikið magn sé að ræða telur lögreglan að þjófarnir hafi getað komið því öllu í stóran jeppa, sendiferðabíl eða notast við kerru.

Lögregla tilkynnti í gær um stuldinn og óskaði eftir upplýsingum um málið frá almenningi. Nokkrar ábendingar hafa borist og hefur lögregla kannað þær í dag. Lögregla segir rannsókn í fullum gangi en vill lítið gefa upp um hana og ekki segja hvort að einhver hafi verið yfirheyrður. Lögreglan segir efnið stórhættulegt og biður alla þá sem kunna að hafa einhverjar vísbendingar að hringja í lögregluna í síma 444-1000.