Stórstjörnur við Heklu

„Ef maður er smeykur við náttúruöflin í þessu fagi þá ætti maður að finna sér annað starf," segir kvikmyndaleikstjórinn Ridley Scott sem átti stuttan fund með blaðamönnum í miðbæ Reykjavíkur í gær. Tökur á stórmyndinni Prometheus hefjast í dag við rætur Heklu. Eins og kom fram í fjölmiðlum í síðustu viku þá virtist Hekla vera að rumska en Scott segist ekki hafa misst svefn yfir þeim fréttaflutningi.

Tökurnar standa yfir næstu tvær vikur. Óskarsverðlaunaleikkonan Charlize Theron, X-Men-hetjan Michael Fassbender og Lisbeth Salander-leikkonan Noomi Rapace eru meðal þeirra sem heiðra Ísland með nærveru sinni næsta hálfa mánuðinn en tökuliðið verður einnig við Dettifoss.

Um gríðarstórt verkefni er að ræða og framleiðslukostnaðurinn hér á landi nemur hundruðum milljóna íslenskra króna samkvæmt heimildum Fréttablaðsins. Scott vildi ekkert tjá sig um það. 160 Íslendingar koma að verkefninu hér á landi ásamt yfir 200 erlendum kvikmyndagerðarmönnum og kaus Scott að kalla það „lítið töku-lið". Hann staðfesti hins vegar að íslenskt landslag yrði ekki í neinu aukahlutverki í myndinni.

„Þetta eru 15 mínútur í heild sinni ef allt gengur að óskum. Við erum að mynda upphaf tímans.“ Leikstjórinn hefur haldið mikilli leynd yfir tökunum hingað til á Bretlandseyjum og fáar myndir frá tökustað þar hafa lekið á netið. Hann segir það mikilvægt fyrir sig og fyrir áhorfendur. Sömu leynd verður viðhaldið hér á landi. „Það er mikið af frumlegu og nýju efni í myndinni og það væri leiðinlegt að eyðileggja það með leka.“

Ísland kom frekar seint inn sem tökustaður, en var samt alltaf möguleiki þegar leit stóð yfir. "Það er hægt að finna svipað landslag á öðrum stöðum í heiminum. En hérna er það samt svo frumstætt og „júralegt“ og það hafði úrslitaáhrif. Ísland er gríðarlega fallegt land.“