Kærði til Persónuverndar þegar hann fékk ekki tímana greidda

Persónuvernd úrskurðaði í janúar að flutningafyrirtæki á Grundarfirði megi fylgjast með starfsmönnum sínum í gegnum ökurita. Það var starfsmaður fyrirtækisins sem kvartaði til Persónuverndar eftir að fyrirtækið neitaði að greiða alla tímana sem hann sagðist hafa unnið.

Í póstsamskiptum á milli Persónuverndar við báða aðila kemur fram að starfsmaðurinn hafi haldið því fram að hann hafi ekið í 387 tíma á einum mánuði. Fannst forsvarsmönnum fyrirtækisins þetta heldur mikið og könnuðu því ökuritann. Hann sagði allt aðra sögu, en þar kom fram að bíllinn hefði verið ekinn í 162 tíma.

Þá keyrði hann 100 klukkustundum lengur en aðrir starfsmenn samkvæmt hans tímabókhaldi, en þeir tóku sérstaklega fram að starfsmaðurinn hefði ekki unnið lengur en samstarfsfélagarnir á hverjum degi.

Sér til varnar hélt starfsmaðurinn því fram að hann hefði ekið fleiri en einum bíl auk þess sem starfið fólst ekki eingöngu í því að aka bifreiðunum, heldur lesta þá, losa og þrífa. Slíkt kæmi ekki fram í ökuritanum.

Persónuvernd tekur að sjálfsögðu ekki afstöðu til vinnulaunamálsins, en kemst að þeirri niðurstöðu að fyrirtækið megi fylgjast með bílum sínum í ljósi þess að þeir eru ekki notaðir í tengslum við einkalíf starfsmanna.

Aftur á móti kemst Persónuvernd að þeirri niðurstöðu að fyrirtækið hefði átt að kynna ökuritann fyrir starfsmanninum. Fyrirtækið hafði reyndar kynnt það fyrir starfsmönnum sínum áður en umræddur starfsmaður hóf störf.