Ríflega 80% strætófarþega ánægð

Ríflega átta af hverjum tíu sem ferðast með strætisvögnum Strætó bs. eru ánægðir með þjónustuna. Þetta er megin niðurstaða árlegs þjónustumats, sem framkvæmt var meðal strætisvagnafarþega fyrir skömmu. Ánægjan með þjónustu Strætó er svipuð nú og árið á undan en þá hafði ánægjan hins vegar aukist umtalsvert frá árinu þar áður.

Þetta kemur fram í tilkynningu frá Strætó bs.

Viðmót og aksturslag bílstjóra

Meðal helstu niðurstaðna könnunarinnar er að 84,4% strætisvagnafarþega voru annað hvort ánægðir eða mjög ánægðir með strætisvagnaferðina. Ef skoðaðir eru nokkrir þeirra einstöku þátta sem mældir voru má nefna að um 71% farþega voru ánægðir eða mjög ánægðir með aksturslagið, en nokkuð fleiri, eða um 78%, voru ánægðir eða mjög ánægðir með viðmót vagnstjóranna. Þá voru um 71% strætisvagnafarþega ánægðir eða mjög ánægðir með stundvísi vagnanna.



Flestir undir 35 ára

Auk þess að mæla ánægju farþega í strætisvögnum Strætó var kannað hver tilgangur ferðarinnar var, hve oft viðkomandi notar strætisvagna, aldursdreifing farþega, kynjaskipting, þjóðerni og fleira. Niðurstöður úr þessum þáttum eru einnig nokkuð svipaðar og frá árinu á undan þótt ákveðin þróun sé merkjanleg. Konur voru bæði árin lítið eitt fleiri en karlar meðal farþega, og næstum því tveir af hverjum þremur farþegum eru undir 35 ára að aldri.

Færri útlendingar

Athygli vekur að nokkur fækkun er í hópi útlendinga í strætó milli ára, úr 12,8% farþega í 7,2% nú. Þrátt fyrir þessa fækkun sýna mælingar á farþegafjölda hjá Strætó aukningu á farþegum milli ára, sem þýðir að Íslendingum sem nota strætó hefur fjölgað umtalsvert síðustu misseri.

Stöðugleiki milli ára

„Við erum að sjálfsögðu ánægð með að langstærstur hluti farþega virðist vera ánægður með þjónustuna sem þeir fá hjá Strætó. Þessi mæling nú sýnir ákveðinn stöðugleika milli ára, en síðustu tvær mælingar sýna meiri ánægju en nokkuð annað ár frá stofnun Strætó bs. En það er alltaf tækifæri til að bæta sig og kannanir eins og þessi nýtast best til þess að sjá hvar við getum gert betur," segir Reynir Jónsson, framkvæmdastjóri Strætó.

Úrtakið í þjónustumatinu var um 650 farþegar Strætó. Þátttakendur fylltu út eyðublað með spurningum þar sem spurt er um þá þjónustu sem þeir fá í viðkomandi ferð auk þess sem kallað er eftir almennum athugasemdum svarenda um þjónustu Strætó. Þórhallur Örn Guðlaugsson, dósent í viðskiptafræði við Háskóla Íslands, sá um úrvinnslu gagna.