Hallgrímskirkja sögð ritskoða listsýningu

Stjórn Myndhöggvarafélags Reykjavíkur segir í grein í Fréttablaðinu í dag að valdamenn, fyrirtæki og stofnanir á Íslandi beiti þöggun og skoðanakúgun. Dæmi sé að sýning Hannesar Lárussonar sem opna átti í Hallgrímskirkju í desember hafi verið slegin af á síðustu stundu.

Sýning Hannesar bar yfirskriftina Líkamshlutar í trúarbrögðum og var unnin í samvinnu við Guðrúnu Kristjánsdóttur, þáverandi sýningarstjóra Listvinafélags Hallgrímskirkju. Hinn 10. desember hengdi Hannes upp kynningar­blað fyrir sýninguna í anddyri kirkjunnar. Á því voru meðal annars augu, hendi, typpi og brjóst. Sóknarpresturinn og organistinn ákváðu í samráði við framkvæmdastjóra Listvinafélagsins að taka auglýsinguna niður. Hannesi var tilkynnt að sýningunni væri frestað.

Að sögn Guðrúnar var það myndefnið sem kallaði fram þessi viðbrögð eftir að Hannes fór ekki að ráðum hennar með val á mynd til að kynna sýninguna. „Það var tekin skyndiákvörðun í hálfgerðu panik­ástandi um að fresta sýningunni. Það var síðan Hannes sjálfur sem tilkynnti það einhliða að ekkert yrði af sýningunni á þessum stað," segir Guðrún.

Í opnu bréfi í Fréttablaðinu í dag má sjá að stjórn Myndhöggvara­félags Reykjavíkur telur illa vegið að Hannesi. „Það liggur í augum uppi að með þessum gjörningi sýnir kirkjan takmarkalaust virðingarleysi gagnvart starfi myndlistarmannsins og virðist hvorki treysta dómgreind hans né sýningar­stjórans," segir stjórnin og minnir á að fyrr í vetur hafi sýning í Listasafni Árnesinga verið blásin af á svipuðum forsendum.

Þórhallur Vilhjálmsson, framkvæmdastjóri Listvinafélags Hallgrímskirkju, segir innihald sýningar Hannesar hafa reynst vera sláandi og ekki henta fyrir sýningarstaðinn í anddyri kirkjunnar. „Það er staður og stund fyrir allt," segir Þórhallur, sem neitar því að Hannes hafi verið ritskoðaður. „Það er þekkt að þeir sem hafa umsjón með listagalleríum hafa um það að segja hvað er sett þar upp."

Sjálfur segir Hannes málið kjánalegt fyrir kirkjuna. „Þessi sýning var unnin á trúarlegum forsendum og var ekkert grín. Ég held að þeir hafi ekki gert sér grein fyrir hvað þeir voru að samþykkja inn í byrjun," segir listamaðurinn.

gar@frettabladid.is