ESB og landbúnaðurinn: Tímasett áætlun forsenda viðræðna

Evrópusambandið segir í nýrri rýniskýrslu að landbúnaður á Íslandi sé mikilvægur vegna dreifbýlisþróunar, fæðuröryggis og sjálfbærni. Þá sé sérstaða íslensks landbúnaðar rík, einkum vegna erfiðra loftslagsskilyrða og strjálbýlis. Því verði nauðsynlegt að leita sértakra lausna fyrir Ísland. Í bréfi frá Jan Tomlinsson, fastafulltrúa Póllands sem fer með formennsku í sambandinu nú um stundir, segir að ekki sé hægt að hefja samningaviðræður um landbúnaðinn fyrr en tímasett vinnuáætlun hafi verið lögð fram.

Íslenskum stjórnvöldum barst skýrslan í dag en hún er afrakstur rýnivinnu um landbúnað og dreifbýlisþróun sem er liður í viðræðum Íslands um aðild að ESB. Í tilkynningu frá utanríkisráðuneytinu segir að í skýrslunni endurspeglist málflutningur fulltrúa Íslands í viðræðuferlinu hingað til um mikilvægi og sérstöðu íslensks landbúnaðar.

Þá kemur fram að stjórnsýsluna hér á landi verið að sníða að innlendum aðstæðum, umfangi og eðli landbúnaðarins og koma verði í veg fyrir að hún  verði of umfangsmikil. „Ennfremur er vakin sérstök athygli á því að Ísland hyggst ekki breyta íslenska landbúnaðarkerfinu í tengslum við aðildarviðræðurnar fyrr en eftir samþykkt aðildarsamnings í þjóðaratkvæðagreiðslu eins og samninganefnd Íslands hefur lagt áherslu á," segir ennfremur.

Í bréfi sem sent var stjórnvöldum í dag kemur fram að sambandið telji að forsenda þess að hægt sé að hefja samningaviðræður um landbúnað sé að íslensk stjórnvöld leggi fram tímasetta vinnuáætlun. „Áætlunin kveði á um hvernig Ísland hyggist verða að fullu reiðubúið til þess að njóta þess ávinnings og axla þær skyldur sem af aðildarsamningi leiða á fyrsta degi aðildar, samþykki íslenska þjóðin aðildarsamning í þjóðaratkvæðagreiðslu. Í bréfinu tekur Evrópusambandið sérstaklega fram að taka skuli tillit til sérstakra aðstæðna á Íslandi," segir ennfremur í tilkynningu ráðuneytisins.